نجرب ماني خاسر شي

اول مرة في حياتي نكتب بلعربي، و بدارجة زادة، اما في الظروف هذي واحد يكتب بالجابوني و شوية

الحاسيلو، اليوم نحب نحكي شويا على الشارع التونسي، اليوم الشعب داخل في حيط و ربي يستر الجميع.

جماعة تحب على اللائكية و جماعة دولة اسلامية، جماعة تحب قايد السبسي و جماعة تحب المستيري، جماعة تحب الهيئة العليا للدفاع على مكاسب الثورة و جماعة قالك لا يلزمنا اعتصام خاتر ما يمثلوش الشعب، جماعة يحبو يستناو الانتخابات و جماعة قالو فؤاد المبزع ما عاد عندو حتا صلوحية، واحنا في هاك السردوك نريشوا و ماكلة بعضها في الفاسبوك و كل واحد يحب يوري اللي عندو الحق و البقية غالطين... وين ماشين يا جماعة... هاذا علاش عباد ماتت؟ هاذا علاش هبطوا للشارع؟ هذا علاش بكيتوا و شطحتوا؟ هذا علاش عسيتوا فليل؟ باش نعملوا الاعتصامات؟ و ننهشوا في لحم بعضنا... هذا حبنا لتونس؟ ....لا طلعنا انانيين، طلعنا نحبو رواحنا، طلعنا نتنوفقوا كيف عسينا علا بعضنا، قلنا لا ماناش باش نخليو حد يركب على ثورتنا ياخي طلعت الثورة كي الترينو، اللي يجي يطلع... عملناه بيدينا و كيما ربي سترنا نهار 14 جانفي ان شاء الله ربي يبقي علينا الستر و على بلادنا